geo_flag eng_flag rus_flag

თიბისი ბანკის მხარდაჭერით შექმნილი ფილმი „გამოსვლა“ ამერიკულ კონოფესტივალზეა წარდგენილი
- +

6 ივლისი. 2016. 14:26


ვახო ჯაჯანიძის მოკლემეტრაჟიანი ფილმი „გამოსვლა" დამოუკიდებელი ამერიკული კინოს ერთ-ერთ საუკეთესო ფესტივალზე Maine  International  Film  Festival-ზე  მიიღებს მონაწილეობას. ფილმს საერთაშორისო  მოკლემეტრაჟიანი ფილმების სექციაში (World shorts) აჩვენებენ.


ვახო ჯაჯანიძის „გამოსვლა" დაცარიელებულ ქალაქ ჭიათურაში, პატარა სახლში მცხოვრები ორი დის, ტატიანასა და ლილის შესახებ მოგვითხრობს. გადარჩენისთვის ყოველდღიური ბრძოლით დაღლილ დებს შორის კონფლიქტი მაშინ იწყება, როცა ლილის „ჭაობიდან" თავის დაღწევისა და თავის ქალიშვილთან საცხოვრებლად გადასვლის შანსი უჩნდება.


„გამოსვლა" იმ 6 მოკლემეტრაჟიან ფილმს შორის ერთ-ერთია, რომელიც ეროვნული კინოცენტრისა და თიბისი ბანკის დაფინანასებით შეიქმნა. ეს იყო პირველი პრეცედენტი, როდესაც ქვეყანაში კინემატოგრაფიის განვითარების მიზნით სახელმწიფო სუბსიდიასთან ერთად კინოწარმოებაში კერძო ბიზნესი ჩაერთო.


ფილმის პრემიერა 2015 წლის ივლისში შედგა და  თბილისის საერთაშორისო კინოფესტივალზე ჟიურის სპეციალური პრიზიც მოიპოვა.


აღნიშნული კინოფესტივალი აშშ-ში 1998 წლიდან იმართება, სადაც, ყოველწლიურად სხვადასხვა ჟანრის საერთაშორისო ფილმები იღებენ მონაწილეობას.


წელს ფესტივალი 8 ივლისს იწყება და  17 ივლისამდე გაგრძელდება.


 

არქივი