geo_flag eng_flag rus_flag

დღეს გოგი ალექსი-მესხიშვილის საიუბილეო გამოფენა გაიხსნება
- +

3 ნოემბერი. 2016. 10:54



3 ნოემბერს, 18:00 საათზე, საქართველოს ეროვნული მუზეუმის დიმიტრი შევარდნაძის სახელობის ეროვნულ გალერეაში,  გოგი ალექსი-მესხიშვილის საიუბილეო გამოფენა გაიხსნება. ექსპოზიციაზე არტისტის მიერ 50 წლის განმავლობაში შექმნილი ნამუშევრები იქნება წარმოდგენილი.  ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე დაესწრება.



1967 წელს გოგი ალექსი-მესხიშვილმა დაამთავრა თბილისის სახელმწიფო სამხატვრო აკადემიის ფერწერის ფაკულტეტი. 1975-92 წლებში იყო რუსთაველის სახელობის სახელმწიფო დრამატული თეატრისა და ზაქარია ფალიაშვილის სახელობის თბილისის ოპერისა და ბალეტის თეატრის მთავარი მხატვარი. 1996 წლიდან მუშაობს ამერიკის შეერთებულ შტატებში, ნიუ-ჰემფშირის შტატში. ის დორტმუტის კოლეჯის თეატრალური სცენოგრაფიის კურსს უძღვება, რისთვისაც ხელოვნების ფაკულტეტის საუკეთესო პედაგოგის ჯილდო მიიღო.



გოგი ალექსი-მესხიშვილი სხვადასხვა სახელმწიფო თუ სახელობითი ჯილდოს მფლობელია. მთელი შემოქმედებითი გზის მანძილზე მიღებული აქვს: საბჭოთა კავშირის სახელმწიფო პრემია (,,კავკასიური ცარცის წრე", 1975წ.); სახალხო მხატვრის წოდება (1981წ.); იგი თბილისის საპატიო მოქალაქე, საქართველოს სახალხო მხატვარი და რუსეთის ხელოვნების აკადემიის საპატიო წევრია.



გოგი ალექსი-მესხიშვილის ნამუშევრები მსოფლიოს თეატრების წამყვან სცენებზე იყო წარმოდგენილი. 1999 წელს ის მონაწილეობდა ვენეციის ბიენალეში, ხოლო 2011 წელს, სხვადასხვა თემატიკის ინსტალაციებით, პრაღის კვადრიენალეზე საქართველოს წარმოადგენდა. მხატვრის ნამუშევრები დაცულია მსოფლიოს მრავალ გალერეასა თუ კერძო კოლექციაში.



გოგი ალექსი-მესხიშვილი კვლავაც განაგრძობს მუშაობას მსოფლიოს სხვადასხვა სცენაზე.

გამოფენა 2016 წლის 23 ნოემბრამდე გაგრძელდება.



მისამართი: დიმიტრი შევარდნაძის სახელობის ეროვნული გალერეა, რუსთაველის გამზ. 11




ბიოგრაფია

გოგი ალექსი-მესხიშვილის სცენოგრაფიები 1985-87 წლების საუკეთესო ნამუშევრებად აღიარეს; ედინბურგის საერთაშორისო თეატრალურ ფესტივალზე „დონ-ჟუანი" კრიტიკის პრემიით დაჯილდოვდა (1988წ.); სერგო ფარაჯანოვის ფილმ „აშიკ-ქერიბის" მხატვრობისათვის ბერლინის საერთაშორისო კინოფესტივალზე ევროპის კინოკრიტიკოსთა მთავარი ჯილდო "ფელიქსი" მიენიჭა (1989წ.); ედინბურგის საერთაშორისო ფესტივალზე "ზაფხულის ღამის სიზმარი" საუკეთესო სპექტაკლად აღიარეს (1994წ.); ელენ ჰეისის პრემიით დაჯილდოვდა და წლის საუკეთესო ნამუშევრად იქნა აღიარებული სპექტაკლი "ჰამლეტი - დანარჩენი სიჩუმეა", რომელიც დაიდგა ვაშინგტონის სინეტიკ-თეატრში (2003წ.); ამავე თეატრში დადგმული "სტუმარ-მასპინძელი" კი ათწლეულის ერთ-ერთ საუკეთესო სპექტაკლად აღიარეს; ლონდონში, რივერსაიდ-სტუდიაში განხორციელებული "ჰამლეტი" მსოფლიოს საუკეთესო დადგმების რიცხვში შევიდა; 2007 წელს მხატვარი მიხეილ თუმანიშვილის სახელობის პრემიით იქნა დაჯილდოვებული.



გოგი ალექსი-მესხიშვილის ნამუშევრები მსოფლიოს თეატრების წამყვან სცენებზე იყო წარმოდგენილი. ეს თეატრებია: ბავარიის სახელმწიფო ოპერა (მიუნხენი), შაუშპილჰაუზი (დიუსელდორფი); "Eტ ჩეტერა" (მოსკოვი); ფინეთის ნაციონალური თეატრი (ჰელსინკი), ჰაბიმას ნაციონალური თეატრი (თელ-ავივი), მარინსკის ოპერისა და ბალეტის თეატრი (სანქტ-პეტერბურგი), კ. მარჯანიშვილის სახელობის სახელმწიფო თეატრი (თბილისი), მეტროპოლიტან-ოპერა (ნიუ-იორკი), მოსკოვის სამხატვრო თეატრი, ოპერას ნაციონალური თეატრი (ბორდო), შექსპირის თეატრი (ვაშინგტონი), თეატრი კომუნალე (ბოლონია), ლა ფენიჩე (ვენეცია), სან-მარტინის თეატრი (ბუენოს-აირესი), თეატრ-დე-შატლე (პარიზი), მ. თუმანიშვილის სახელობის თეატრი (თბილისი), დიდი დრამატული თეატრი (სანქტ-პეტერბურგი), სინეტიკ-თეატრი (ვაშინგტონი), რიჩარდ ფიშერის ხელოვნების ცენტრი (ბარდის კოლეჯი, აშშ), პუშკინის სახელობის თეატრი (მოსკოვი), ნოვოსიბირსკის ოპერისა და ბალეტის თეატრი, დიდი თეატრი (მოსკოვი) და ა.შ.

 



 


 

არქივი